Fær 60 milljóna styrk til að rannsaka Hvalfjörð

Sjávarrannsóknasetrið Röst hefur veitt Hafrannsóknastofnun Íslands 60 milljóna króna styrk til rannsóknar á haffræði Hvalfjarðar.

Rannsókninni er miðað að því að undirbúa tilraunir með nýja aðferð við að fjarlægja koltvísýring úr andrúmsloftinu.

Þetta kemur fram í sameiginlegri tilkynningu Röst og Hafrannsóknarstofnunar.

Hófst í mars

Verkefnið felst í sér grunnrannsóknir á því hvernig sjávarumhverfið í Hvalfirði breytist og þróast eftir árstíðum. Bátur á vegum Háskóla Íslands verður nýttur til mælinga á fjölda umhverfisþátta í Hvalfirði.

Verkefnið hófst í mars og talið er að því ljúki í lok september. Vonast er til að rannsóknin leiði til dýpri þekkingar á straumkerfi fjarðarins, hita, seltu, efnasamsetningu og frumframleiðni hans.

Á grunni vísinda

„Loftslagsbreytingar og súrnun sjávar eru hraðar breytingar sem ógna vistkerfum jarðar. Nauðsynlegt er að draga úr losun koldíoxíð en einnig hefur verið skoðað að beita ýmsum leiðum við að fanga of fjarlægja kolefni,“ er haft eftir Hrönn Egilsdóttur, sviðsstjóra umhverfissviðs hjá stofnuninni.

„Gríðarlega mikilvægt er að ákvarðanir um slíkar aðgerðir byggi á sterkum vísindalegum grunni og svara þarf spurningum um virkni slíkra aðferða og möguleg óæskileg umhverfisáhrif þeirra. Þetta tiltekna verkefni gengur út á að auka grunnþekkingu til að undirbyggja ákvarðanir um frekari rannsóknir á svæðinu.“

Okkar stærsta áskorun

Haft er eftir Salome Hallfreðsdóttur, framkvæmdastjóra Rastar, að ein stærsta áskorun samtímans sé að draga úr losun gróðurhúsalofttegunda. Jafnframt sé nauðsynlegt að finna öruggar, skilvirkar og sannreyndar leiðir til að fjarlægja koltvísýring úr andrúmsloftinu.

„Lykilforsenda þess að geta stundað vísindalegar rannsóknir á þessu sviði er að afla grunngagna og það er ómetanlegt að geta leitað til Hafrannsóknarstofnunar með þá miklu reynslu og fagþekkingu sem þar er að finna,“ er haft eftir Salome.

Röst sjávarrannsóknarsetur er nýstofnað dótturfélag íslenska loftslagsfyrirtækisins Transition Labs og er hluti af alþjóðlegu samstarfsneti Carbon to Sea Initiative.

Niðurstöður verkefnisins verða aðgengilegar öðrum vísindamönnum með milligöngu Seanoe-samtakanna og í grein sem birt verður í vísindaritinu Earth System Science Data.

• Blogga um frétt