Vegna eldsumbrotanna á Reykjanesskaga hefur verið ákveðið að hefja tilraunaboranir eftir heitu vatni á Suðurnesjum. Hefur Kadeco, þróunarfélag Keflavíkurflugvallar, veitt heimild til að bora á nærsvæðum flugvallarins í Keflavík.
Pálmi Freyr Randversson framkvæmdastjóri Kadeco segir að félagið hafi veitt heimild til rannsóknarborana á svæðinu eftir að jarðeldarnir hófust á Reykjanesi, til þess að auka orkuöryggi á Suðurnesjum og skapa mikilvæga varaleið til þess að koma heitu vatni inn á veitusvæðið. Markmiðið er að hefja nýtingu á svæðinu og tryggja heitt vatn fyrir byggðina.
HS Orka stýrir verkefninu en ÍSOR hannar og staðsetur holurnar. Verkís hannar búnað til nýtingar á vatninu og Efla starfar fyrir hönd almannavarna við samræmingu.
Reynir Sævarsson, byggingaverkfræðingur hjá Eflu, segir ýmsar hindranir hafa verið í upphafi verksins en að nú sé búið að bora 800 metra djúpa holu. Eftir að ákveðnu dýpi er náð gengur borunin betur og eru afköstin um 100 metrar á sólarhring.
Hægt er að nálgast umfjöllunina í heild sinni í Morgunblaðinu í dag.