Slagur Íslands- og bikarmeistara í kvöld

Íslandsmeistarar mæta bikarmeisturum í kvöld þegar þrír leikir fara fram í þriðju umferð Bestu deildar kvenna í fótbolta.

Íslandsmeistarar Vals fá bikarmeistara Víkings í heimsókn í Reykjavíkurslag á Hlíðarenda klukkan 18. Liðin mættust í Meistarakeppni KSÍ á sama stað rétt áður en Íslandsmótið hófst og þá sigruðu Víkingkonur í vítaspyrnukeppni eftir að leikurinn endaði 1:1.

Bæði lið eru ósigruð í Bestu deildinni en Valskonur eru með sex stig eftir tvo sigurleiki gegn Þór/KA og Þrótti og nýliðar Víkings eru með fjögur stig eftir sigur á Stjörnunni og jafntefli við Fylki.

Á Akureyri hefst viðureign Þórs/KA og Þróttar klukkan 18 í Boganum en grasvöllur  Þórs er ekki tilbúinn  til notkunar. Þór/KA er með þrjú stig eftir sigur á FH en Sandra María Jessen hefur skorað öll fimm mörk Akureyrarliðsins til þessa. þróttarkonur eru með eitt stig eftir tap gegn Val og jafntefli gegn Fylki.

Loks mætast Fylkir og Keflavík í Árbænum klukkan 19.15 en bæði lið eru á höttunum á eftir sínum fyrsta sigri. Nýliðar Fylkis eru með tvö stig eftir jafnteflisleiki gegn Þrótti og Víkingi en Keflavíkurkonur hafa tapað báðum sínum leikjum, gegn Breiðabliki og Stjörnunni.

• Blogga um frétt