Leit að sjómönnum úr áhöfn togarans MFV Lepanto hefur verið hætt. Togarinn sem er 35 metra langur og 7,5 metra breiður sökk föstudaginn 17. maí síðastliðinn um 35 mílur vestur af Höfðaborg í Suður-Afríku og er enn ellefu af tuttugu áhafnarmeðlimum saknað. Talið er að þeir hafi drukknað.
Fram kemur á vef útgerðarinnar Sea Harvest að níu úr áhöfninni komust frá borði í björgunarbát og var þeim bjargað af togaranum MFV Armana sem var á svæðinu og er gerður út af sama félagi.
Um leið og neyðarkall barst frá Lepanto var sett af stað umfangsmikil leitar- og björgunaraðgerð. Í tilkynningu á vef siglingaöryggisstofnun Suður-Afríku tóku fjögur fiskiskip þátt auk flugvélar og þyrlu.
Fundu tóman björgunarbát
Báðir björgunarbátar togarans fundust en í öðrum voru þeir níu sem björguðust en enginn í hinum. Seint á laugardag fundust munir af togaranum en ekkert hefur sést til þeirra ellefu sem enn er saknað.
„Við skoðun á framvindu leitar, framkvæmd hennar og skort á vísbendingum allt frá upphafi leitar, og veðurfars ákvað stjórnstöð björgunaraðgerða (MRCC) að leitaraðgerðum skyldi hætt,“ segir í tilkynningu stofnunarinnar.
Siglingaöryggisstofnun Suður-Afríku upplýsir einnig að hafin er rannsókn á tildrögum slyssins.
Heitir stuðningi við fjölskyldur
„Það er forgangsverkefni að tryggja öryggi starfsfólks okkar. Sem fyrirtæki erum við slegin yfir þessum harmleik. Við höfum verið í stöðugu sambandi við fjölskyldurnar þar sem stjórnendur og ráðgjafi heimsóttu hverja fjölskyldu hinna týndu manna. Við munum halda áfram að styðja þau, sem og björgunarmennina og fjölskyldur þeirra,“ er haft eftir Felix Ratheb, forstjóra Sea Harvest, í yfirlýsingu á vef útgerðarinnar.
„Við erum í nánu samstarfi við viðeigandi yfirvöld, fyrst og fremst siglingaöryggisstofnunina, til að komast að orsökum slyssins eins fljótt og auðið er. Við þökkum starfsmönnum okkar og björgunarstofnunum fyrir virkar leitar- og björgunaraðgerðir síðan á föstudag,“ segir hann.