Streymisveitan Netflix hefur staðfest að verið sé að gera nýja Happy Gilmore-kvikmynd. Eins og mörgum er kunnugt um þá er það bandaríski stórleikarinn Adam Sandler sem fór með aðalhlutverkið í Happy Gilmore árið 1996 og verður engin undantekning á því núna.
„Happy Gilmore snýr aftur! Adam Sandler mun endurtaka hlutverk sitt í glænýrri kvikmynd sem kemur á Netflix,“ segir í færslu Netflix á samfélagsmiðlinum X, áður Twitter.
Happy Gilmore is back! Adam Sandler will reprise his iconic role in a brand new movie coming to Netflix. pic.twitter.com/AERdtqlJ6j
— Netflix (@netflix) May 15, 2024
Happy Gilmore fjallar á spaugilegan hátt um fyrrverandi íshokkíleikara sem dettur niður á golfíþróttina til að sjá sér og ömmu sinni farborða. Hann kann ekkert í golfi en sveiflar kylfunni með tilhlaupi með árangursríkum hætti.
Ekki er búið að gefa út hvenær Happy Gilmore 2 verður gefin út en Adam Sandler sagði í viðtali í „The Dan Patrick Show“ að hann væri byrjaður að taka upp kvikmyndina.
Þá greindi hann frá því að hann væri að vinna að handritinu með Tim Herlihy, sem skrifaði einnig handritið á fyrstu kvikmyndinni með Adam Sandler.